4-Days Residential Training under JJM for VWSCs concluded

 4-Days Residential Training under JJM for VWSCs concluded

Mawkyrwat, March 30, 2022: The 4-Days Residential Training under JJM for Village Water and Sanitation Committees (VWSCs) of South West Khasi Hills District (SWKHD) organised by University of Science & Technology Meghalaya (US&TM) and supported by the Ministry of Jal Shakti, govt. of India and government of Meghalaya at PHE Hall Mawkyrwat concluded today with the distribution of certificate to participants.

Concluding sessions were given by Smti. Zera Wahlang, Water Analyst, PHE Mawkyrwat who spoke about the different types of treating water that include Ph test, turbidity test, total hardness, chloride test, free chlorine, iron (fe), Nitrate, fluoride and bacteriological test. The master trainer of the 4-days training included Dr. Nibedita Paul, PD, KRC, Jal Jeevan Mission, Shri. Er. P.P Sharma, Technical Expert, JJM, Shri. Rituparna Borkataki, MIS Expert, JJM and Shri. Onessimos Shangdiar, Training Coordinator,

The valedictory function was chaired by Shri. Onessimos Shangdiar, Training Coordinator, Dr. Nibedita Paul, PD, KRC, Jal Jeevan Mission delivered the welcome address, speech from the Chief Guest the i/c EE, PHE, Mawkyrwat Shri R. Nongdhar, SDO Mawkyrwat Sub Division, there was sharing from the trainees who participated the 4-days residential training, Shri. Khrawkupar Shangdiar, member VWSC Photjaud War, vote of thanks form among the participants was given by Smti. Twildaris Syiemlieh, member VWSC Rangthong and Shri Rituparna Borkataki, MIS Expert delivered the vote of thanks

La pynkut ia ka jingai jinghikai ba 4 sngi hapoh ka JJM ia ki VWSCs jong ka SWKHD

Mawkyrwat, Lber 30, 2022: Ka University of Science & Technology Meghalaya (US&TM) mynta ka sngi ka la pynkut noh ia ka 4-Days Residential Training under JJM na ka bynta ki Village Water and Sanitation Committees (VWSCs) jong ka South West Khasi Hills District (SWKHD) kaba la pynlong hapoh PHE Hall Mawkyrwat.

Ia katei ka jingai jinghikai la kyrshan da ka Ministry of Jal Shakti, jong ka Sorkar India ha ryngkat lang ka Sorkar Jylla ban ai jinghikai ia ki VWSCs khnang ba kin dup lah ban sumar, test, pynkhuid bad maramot ia ka umbam umdih ha ki shnong ki thaw ba la pynpoi lyngba jong ka skhim Jal Jeevan Mission.

Haba kren kum u kongsan ha katei ka sngi pynkut u i/c EE, PHE, Mawkyrwat bah R. Nongdhar, SDO Mawkyrwat Sub Division U la ai khublei ia ki member jong ki VWSC ba ki la iashim bynta ha ka prokram jinghikai na ka bynta ban sumar ia ka umbam umdih ha ki shnong ki thaw jongki, u la kyntu ba kin pyndonkam hok ia ki jinghikai ba ki la ioh ha kaba iadei bad ka umbam umdih bad kumjuh ruh ban long ki nongrahkhubor sha ki nongshong shnong ba kin long ki captain ban ialam ia ka shnong ka thaw. U la ong ruh ba ka long kaba donkam eh ban pynneh pynsah ia ki tyllong um bad kiar na ka jingpom pathar ia ki dieng ki siej ioh ba lada ngim sumar ia ki kan sa poi ka por ba ‘ka um kan kham kordor ban ia ka ksiar’ bad ngin sa kyrduh um. U la iathuh ruh ba ka tnad PHE ka pyrshang ban ai ki jinghikai bapher bapher kum ban leh mapping, testing, bad ban sumar ia ki tyllong umbam umdih ha kajuh ka por ruh ban lehkhuid hynrei la da ki paidbah kim niewkor kan sa shu pulom kai ka jinghikai.

Ka Dr. Nibedita Paul, PD, KRC, Jal Jeevan Mission ka la iathuh ba ka Ministry of Jal Shakti, Govt. of India bad ka Sorkar Meghalaya ki la jied ia ka USTM ban ai pynlong bad ai jinghikai ha kaba iadei bad ka skhim Jal Jeevan Mission.

Ha katei ka sngi pynkut la ioh ka jinghikai na ka kong Zera Wahlang, Water Analyst, PHE Mawkyrwat halor ka phang kumno ban test ia ka um naduh na tyllong bad ynda la poi ha ki iing ki sem. Ka la iathuh ba ki don kumba khyndai jait ki jingtest ba dei ban leh bad ki ta ki kynthup ia ka Ph test, Jingjngut, total hardness, chloride test, free chlorine, iron (fe), Nitrate, fluoride bad bacteriological test. Ki Nongai jinghikai (master trainer) ki kynthup ruh ia ka Dr. Nibedita Paul, PD, KRC, Jal Jeevan Mission, u Er. P.P Sharma, Technical Expert, JJM, u Rituparna Borkataki, MIS Expert, JJM bad u bah Onessimos Shangdiar, Training Coordinator.

Haba pynpaw ia ka jingioh jingmyntoi na katei ka jinghikai ba 4-sngi, uwei na ki nongiashimbynta, Bah Khrawkupar Shangdiar, member VWSC Photjaud War u la ong ba nyngkong eh u la tip kumno ban sumar bad test ia ka um shuwa ba ngin pyndonkam iaka ban lait na ka jingpang, kumno ban sumar (maintain) ia ka um ba ioh lynba ka JJM khnang ba ka shnong ka thaw kan pahuh ha ka umbam umdih, kumno ban buh ia ki jingialang ba iadei bad ka um, ban buh ki kot ki sla bad ban lum ia ka bai um khnang ban sumar ne maramot lada ka duh ka um bad kumno ban tyngkai ia ka um da kaba ngin don ka jingieid bad burom ia ka mariang. U la pynpaw ruh ia ka jingsngewnguh ia ka kynhun na USTM ba ki la ai ia ka jinghikai ba 4 sngi ia ki.

Ia katei ka porkram pynkut la pyniaid da u bah Onessimos Shangdiar, Training Coordinator, la kren pdiang sngewbha da ka Dr. Nibedita Paul, PD, KRC, Jal Jeevan Mission, na ka liang ki nongiashimbynta la kren ai khublei da ka kong Twildaris Syiemlieh, member VWSC Rangthong bad la kren pynkut da u Rituparna Borkataki, MIS Expert.

Ai jinghikai ba 4 sngi ka USTM hapoh ka JJM ia ki VWSCs ha Mawkyrwat

 

Mawkyrwat, Lber 28, 2022: Ban kyntiew ia ka jingtip halor ka jingniewkor ia ka um, kumno ban tyngkai bad sumar ia ka, ka University of Science & Technology Meghalaya (US&TM) da ka jingkyrshan ka jong ka Ministry of Jal Shakti, jong ka Sorkar India ha ryngkat lang ka Sorkar Jylla, ka la pynlong ia 4-Days Residential Training under JJM kaba la pynlong hapoh PHE Hall Mawkyrwat.

La plie pyrda ia katei ka jingai jinghikai ha ka 26 tarik Lber, 2022 da u Bah Renikton Lyngdoh Tongkhar, PHE Minister bad MLA ka Mawkyrwat Constituency ha ka jingiadonlang ka kong Caramai Kharkongor, IAS, Deputy Commissioner, South West Khasi Hills District (SWKHD), Mawkyrwat, u i/c EE, PHE, Mawkyrwat bah R. Nongdhar, SDO Mawkyrwat Sub Division, ki Nongai jinghikai (master trainer) ba kynthup ia ka Dr. Nibedita Paul, PD, KRC, Jal Jeevan Mission, u Er. P.P Sharma, Technical Expert, JJM, Rituparna Borkataki, MIS Expert, JJM bad u bah Onessimos Shangdiar, Training Coordinator.

U bah Renikton Lyngdoh Tongkhar, Myntri ka tnad umbam umdih jong ka Jylla Meghalaya, ha ka jingkren jong u ha ka sngi plie ïa ka jingai jinghikai ba 4 sngi lynter ba la pynlong hapoh ka hall jong ka PHE Mawkyrwat Division da ka University of Science & Technology Meghalaya (US&TM) bad kaba la bei tyngka da ka Ministry of Jal Shakti ka Sorkar India u la ong ba wat hapdeng ki jingbunkam hynrei u la pyllait ka por ba kyrpang ban ïa don bynta lang ha kane ka sngi khnang ba kan long ka jingmyntoi na ka bynta ki paidbah kiba wan ha kane ka sngi ban ïoh shibun ki lad jinghikai halor ka jingdonkam jong ka um.

U la ong ba ai ba kane ka jingpynsngewthuh halor ka jingdonkam jong ka umbam umdih kan da rung bad kan da long doh long snam ha ka jingmut jingpyrkhat jong iwei pa iwei na ki nongshong shnong jong ka jylla bad jong ka ri hi baroh kawei. Namar kumba kane ka long, ka jingangnud bad ka jingphohsniew jong u Myntri Rangbah duh jong ka Ri India ha ryngkat ka jingïatreilang jong ka sorkar Meghalaya ki thmu ban pynurlong ban pynpoi um ha baroh ki thliew ïing.

U kwah ruh ban ong, ba lada kane ka jingthmu jong ka sorkar kam rung ha ka jingmut jingpyrkhat jong ki paidbah kan long kaba eh ïa ka sorkar ban pynïaid shaphrang ïa ki kam bad kumjuh ruh lada ki nongïalam shnong ki wanrah ïa shubun ki jingeh kan long ruh kaba eh na ka bynta ka sorkar jylla ne ka sorkar India ban leh ei ei ïa kiba kum kita ki jingeh, namar shwa ban pynïaid shaphrang ïa ki kam kum ki shnong ki thaw ki dei ban don lypa ka jingïathir jingmut kumno ban leh ne ban pynlong kam.

Namarkata, ban weng ïa kita ki jingeh u la kyntu na ka bynta ki paidbah nongshong shnong ba kin don ka jingïatreilang bad ka sorkar ha baroh ki liang bad lyngba kane ka program ai jinghikai ha kaba kumno kin tip ïa ka role ne ki rukom pynïaid kam la jong, jong uwei pa uwei ba kin lah ban ai ei ei ne contribute ban long ka lynti ne ka tynrai jong ka jingkyrkhu ha kaba kin lah ban long ma ki ki nongpynïoh um ha ki shnong ki thaw.

Ha kajuh ka por u la buh ruh ka jingkyrpad na ka bynta ki paidbah ba ki dei ban don ka jingjynsur mynsiem ha kaba ïa dei bad ki jaka ba don pahuh ka um, khnang ba kan long ka jingkyrkhu na ka bynta ki paidbah nongshong shnong.

Ka Dr. Nibedita Paul, PD, KRC, Jal Jeevan Mission ka la iathuh ba ka Ministry of Jal Shakti, Govt. of India bad ka Sorkar Meghalaya ki la jied ia ka USTM ban ai pynlong bad ai jinghikai ha kaba iadei bad ka skhim Jal Jeevan Mission. Ka bynrap ba katei ka jingai jinghikai ba saw sngi ka dei ka sien kaba nyngkong eh ban ai jinghikai ha South West Khasi Hills District, Mawkyrwat. Ka la ong ruh ba ki nongiashim bynta ha katei ka prokram ai jinghikai ki long ki briew na ki Village Water and Sanitation Committees (VWSCs) jong ki shnong bapher bapher napoh ka district. Ka ban ruh ba lyngba katei ka jinghikai ki briew jong ki VWSCs kin lah ban peit ia ka umbam umdih, ban maramot lada don ka jingduh ha ki pipe um, ban iitkhmih la ka um ka long kaba khuid ne ka ba bit ba biang ban bam ban dih, bad ban peit ia ka jinglehkhuid ha ki shnong ki thaw. Ka la batai ruh haba ki VWSCs ki la ioh ia ki jinghikai ba biang ka sorkar kan sa phah pisa direct sha ki VWSCs ban peit ia ki kam ha kaba iadei bad ka um naduh ba supply haduh ban da poi ha ki iing ki sem.

 

Pynlong ka DBMU ia ka prokram “ka jingsamlang ia ja jingtip ban kyntiew ia kiwei” ha Mawkyrwat

 

Mawkyrwat, Lber 25, 2022: Ka ophis jong u District Project Management Unit, South West Khasi Hills District (SWKHD), Mawkyrwat hapoh ka shatri jong ka Meghalaya Basin Management Agency (MBMA) da ka jingkyrshan jong ka Sorkar Jylla bad ka International Fund for Agricultural Development (IFAD) mynta ka sngi ka la pynlong ia ka prokram “Ka jingsamlang ia ja jingtip (Knowledge Sharing Event)” halor ka phang “Ktah ia ka jingim! wanrah ia ka jingkylla (Touching Lives! Making a difference)” ba la pynlong hapoh Multipurpose Hall DC, Office Mawkyrwat. Ha katei ka prokram jingsamlang ia ja jingtip ha kaba iadei bad ki kam trei lyngba ka jingkyrshan ka MBDA (Knowldege sharing event on best practices of various interventions from projects under MBDA) la ia don lang ka Kong C. Kharkongor, IAS, Deputy Commissioner, SWKHD, Mawkyrwat, Bah W. B Biam, MCS, ADC, u bah Lastborn Myrthong, MCS, EAC, ki ophisar sorkar bad ki nongiashim bynta na ki shnong bapher bapher.

U bah Ivan Renold Marbaniang, DPM, Megh-Lamp ula iathuh ba ka jingthmu katei ka prokram ka long ban ai ka rynsan ia kiba la ioh jingmyntoi na ki project bapher bapher napoh MBMA ha ka jingiatreilang bad kiwei ki department jong ka sorkar ba kin ia phylliew jingmut bad sam ia ki jingtip halor ki kam ba ki trei khnang ba kiwei ruh kin iohi nuksa bad pyrshang ban buddien bad ban kyntiew ia ka roi ka par, ka ioh ka  kot ki riew shimet ne ia ka shnong ka thaw. U la ong ruh ba ka long ka jingiakren na kawei ka kynhun na ki shnong sha kiwei pat (community will talk to the community).

Ha ka jingkren lamphrang ka kong C Kharkongkor, Deputy Commissioner, SWKHD, Mawkyrwat ka la ong ba mynta ki briew ki la dei ban pyntbit ia ka rukom treikam katkum ka juk ba mynta wat lada ki long ki jingtrei ba la trei naduh mynyndai khnang ban kyntiew ia ka roi ka par. Ka la bynrap ruh ba ki briew mynta ki dei ban pyndonkam ia ka information Technolgy ha ki kam ki jam jongngi khnang ba kin lah ban ai jingtip sha kiba bun ki briew da kaba buh ia ki dur, video ne ki jingthoh ha kaba iadei bad ka rukom trei, ka jingpynmih ia u soh jong ki kam jongngi khnang ba ki briew kin iohlad ban thied ia ki mar ki matta jongki. Ka la ong ruh ba lyngba ka jinglah ban kyntiew ha ka khaii pateng ki kam ba ngi trei kan sa kiew ha kajuh ka por kan sa iarap ia ka ioh ka kot jong ka iing ka sem bad ka imlang sahlang.

Ha katei ka sngi la ioh ka jingkren na khyndai ngut ki briew ba la kiew bha kum ka kynhun ha ka rukom treikam jongki ha ki kam bapher bapehr ki la la leit iashim bynta ha ki ba bun ki prokram ha ka jylla, ka ri bad ka pyrthei baroh kawei.

Haba kren kum uwei na ki kynhun ba la kham kiewbha u bah Markstarwell Langte, Nongkdait Nongtwah IVCS  u la batai halor ka jingiaid lynti jong ka Nongkdait Nongnah Integrated Village Co-operative Society Nongnah (IVCS), SWKHD, Ranikor. U la ong ba nyngkong eh kim pat ioh jintip shaphang ki IVCS bad hadien ka jingpynshai na DBMU ki la ioh jingtip bad ioh ban sdang ia ka IVCS ha ka 25 September, 2017 bad ka thong ka long ban iarap ha ka banking system bad kiwei ki kam pynroi hapoh ka shnong ka thaw, ka district bad ka jylla baroh kawei. Ka kam ba ki trei ka kring ia u paidbah ba kin rung hapoh ka kynhun, ba kin long kiba iatylli bad ka la kyntiew shibun ia ka ioh ka kot bad ka rukom im u paidbah.

U bah Robertson Basant, Environmentalists bad member kynhun Friends of Umngi River u la kren halor ka phang kumno ban pynneh pynsah ia ki sim moina ha ka shnong Umpung (Preservation Of Hill Mynnas at Umpung Village). U la ong ba ki sur jong ki sim ka pyntngen iangi haba ngi don ha ki khlaw ki btap bad haba ngi sngew kynjah. Ha ka jingiakren bad ki bor pyniaid district u la iathuh ba ki la pynmih ka hukum ban ym shah shuh ban siat ia ki sim. U la iathuh ba ki la shna ia ki ruh moina bad buh ha ki khlaw ba kin leitshong ki moina bad la kyntu ruh ia ki briew ka dong ka thain ba kin ym pom ia ki dieng ba long jingbam jong ki sim ha ka dong ka thain. Da ka jingsngewsarong u la iathuh ba ka jingdon ki moina ha ka thain ka la sdang kiew bad kiwei ki jait sim ruh ki la sdang roi. U la ong ba lada ngi ri bad sumar ia kiei kiei ba ka mariang ka ai ngi ruh ngin sa ioh shibun ki jingmyntoi ba kan ai iangi. U la batai ruh halor ka rukom long ki sim ha ka jingwad jingbam, jingsumar bad pynroi ia ki khun. U la kyrpad ia ki briew ba kin sngewbha ban ym thang khlaw shuh, siat shuh ia ki sim, ne pynjulor ia ka mariang na ka mynta ka bha ka miat hadien habud.

Ka kong Damarsilin K Hari ka la pharia jingtip halor ka Mel’s Processing Unit, Mawkyrwat. Ka la iathuh ba ka thong ka long ban pyndonkam ia ka spah mariang ban kyntiew ia ka ioh ka kot ha ka imlang sahkang da kaba pyndonkam da ki soh, ki syntiew bad ki wei ki jhur ne kynbat ban shna umsoh ne wain. Ka la ong ba lyngba ka jingdon katei ka unit ki la lah ban tip ia ka jingkordor jong ki jingthung ha ka mariang te namarkatta ka iarap ban pynneh pynsah ia ki dieng bad ki jingthung bapher bapher. Ka iathuh ruh ba ki briew kin ym lah ban shu pyndonkam ia ki soh bad ki jingthung tang ban bam hynrei da ka jinglah ban pynkylla sha ka umsoh ne ka wain ka la iarap ban ym pynsepei  ia ki bad ban die sha ki bynta bapher bapher jong ka jylla bad ka ri hi baroh kawei.

U bah Iktiar Langte, Nongkdait Nongtwah Collective Marketing Centre u la iathuh ba ka jingsdang ia katei ka kynhun bad jaka ka long dei hadien ka jingtreikam bad radbah jong ka Nongkdait Nongnah IVCS. U la iathuh ba ki la iohpdiang ka jingiarap kumba T. 12 Lakh (tyngka) ban tei ia katei ka jaka bad ia mynta ki la lah ban buh ia u synsar bad ban pynlong kum ka ophis treikam. U la iathuh ruh ba katei ka CMC ka la sdang ban lum thup ia u synsar da kaba thied na ki briew na katei ka dong ka thain bad kin sa leit die ha ka por ba kham biang ka dor. 

U President ka Wah Rilang View Point Integrated Convergence Development Project Bah Clearson Khar Syiemlieh u la batai halor ja jingsdang jong katei ka jaka jngohkai pyrthei naduh u snem 1999. U la iathuh ruh ia ka khana samari kumno ba la sdang ban tei ia katei ka jaka bad kiei ki jingdon jingem bad ki jingthung jingtep ba katei ka jaka ka don ban khring ia ki nong jngohkai pyrthei. U la iathuh ruh ba ki la ioh ka jingiarap na ki department bapher bapher ba kynthup ia ka Soil and Water Conservation Department, Ka Tourism Department bad ka PWD Department, MGNREGA, DBMU, NERCOMP, DRDA bad ruh na ka Rurban mission. Da ka jingsngewkmen u la ong ba mynta lyngba katei ka jaka ki la lah ban aikam kumba 5 ngut ki briew man ka sngi bad ka jingiohnong ka la kot haduh shi lak sanphew hajar  tyngka (T. 150000) shisnem nalor ba la siew ia ka bai trei. 

U bah Twolding Jyrwa, Tynnai Bee Keeping Industrial Co-operative Society Ltd. u la batai halor ka jingsdang katei ka kynhun. U la batai kumno ban ri ngap, kiei ki jingeh ban ri ngap, kumno ban pynroi ia ki ngap, ban pynneh pynsah ia ka ngap bad ban pyniaid iew ia ka umngap ha ka dor ka ba bit. U la iathuh ba ki dawai ba ai ha ki jingthung ki pyniap bad pynduh jait ia ki ngap. U la pyntip ba na ki briew ka kynhun jongki ba la ioh jinghikai ki la lah ban ai jinghikai ia kiba bun kiwei pat ki nongrep lada kwah ban ri ngap. U la pynkut da kaba ong ba ka ngap ka dei kawei na ki dawai ba khlain tam ia u briew na ki jingpang ba bunjait. 

U Bah Jackman D. Shira, Para-vet Cum Service Provider u la batai halor ka rukom ri, sumar bad ai dawai ia ki mrad kum ki sniang, ki masi bad kiwei pat ki jingri. U la iathuh ruh ba lyngba katei ka kynhun ki la leit ai jinghikai bad ai jingsumar ha kaba iadei bad ki jingri sniang sha kiba bun kiwei pat ki jaka. 

U bah Destardland Kharlyngdoh u la kren halor ka Nonglang Community Nursery ba ka la sdang ha u bnai Jymmang, 2017 ha ka jaka ba 1080 Sq.Mtr. da ka jingthmu ban pynneh pynsah ia ka mariang kum ia ki khlaw ki btap, ki wah bad ki tyllong um, ban pynbha bad sumar ia ki catchment area bad kumjuh ruh ban kyntiew ia ka roi ka par bad ka ioh ka kot jong ki paidbah nongshong shnong. U la batai ruh shaphang ka jingsara ia ki dieng bapher bapher ban thung pat ia ki sha ki catchment area bad sha kiwei pat ki jaka bym don dieng. U la iathuh ruh ba naduh u snem 2017 haduh 2021 ka jingiohnong ka la long kumba T. 184000/- na kaba die ia ki dieng.

Ka Sumitra Ch. Sangma, ka la kren halor ka Implementation of Water Conservation-Construction of Check dam of water security (Domestic Purpose) in Convergence with MGNREGA at Mawpyllun Ranikor. Ka la iathuh ba nyngkong ka la don ka jingkyrduh um ha shnong ha thaw hynrei mynta pat ka la pahuh ka um. 

Ban pynshit phynshngain ia katei ka prokram la ioh ka jingshad tynrai ‘Ka Chad Sngei’ na ka Ri Maram Folk Academy, Mawlangwir bad ka jingrwai kyrpang na ka kynhun Lala Sisters ba la rwai da ka kong Lapdiang bad Lawan Nongsiej ba la ai kyrteng ‘Ko Ri Baieid’. Ka la don ruh ka jingsam ia ki syrnot sha ki shiphewngut ki nongiashim bynta kiba la kiew bha ha ka rukom treikam jongki ha ki kam bapher baphet ba ki trei kum ka kynhun ba la ai jingiarap da ka DBMU bad kiwei ki tnad sorkar. 

Ha katei ka prokram ba la pyniaid da ka kong Mumie N. Shangpliang, Senior Manager - RF, la kren pdiang sngewbha da u bah Ivan Renold Marbaniang, DPM, Megh-Lamp bad la ioh ia ka jingkren ai khublei na u bah John Kearney Wanniang.

Pynshai paidbah shaphang ka jingkordor ka Um bad ka skhim JJM da ka rally ha Mawkyrwat

 

Mawkyrwat, Lber 24, 2022: Kum shibynta ban pynshai paidbah halor ka jingkordor jong ka umbam umdih ha man la ki tyngkong iing ka ophis jong u Executive Engineer, PHE Cum Member Secretary DWSM (JJM), South West Khasi Hills District (SWKHD), Mawkyrwat mynta ka sngi ka la pynlong ia ka jingiaid paidbah (rally) ha kaba iadei bad ka Jal Jeevan Mission (JJM) kaba la sdang na phyllaw ophis jong u Block Development Officer, Mawkyrwat C&RD Block bad pynkut ha phyllaw ka ophis PHE, Mawkyrwat. Ha katei ka jingiaid rally la iashim bynta shitrhem da ki khynnah pule jong ki skul bapher bapher ryngkat ka jingsynran lang u paidbah bad ki nongtrei ka PHE kiba la pyrta ia shibun ki jingthoh (slogan) kum “Save water save life”, “no water no food, yes water yes food”, “wat bret niut pathar sha lum sha wah ioh ngi jynjar trah”, “ngim im khlem ka um” bad kiwei dei. Ki la rah ruh ki placard ba thoh shibun ki kyntien kum “ka um ka dei ka jingim, ngi dei ban tyngkai ia ka”, “conserve water to sustain life”, “ka um ia ngi ka ai jingim bad lada ngim tyngkai u Blei ia ngi un tim” bad kiwei de ki jingthoh ba iadei bad ka jingsumar, jingtyngkai bad pynneh pynsah ia ka um.

Haba kren shuwa ban sdang katei ka jingiaid paidbah u Bah Stevan Roy Wahlang, District Coordinator, JJM, Mawkyrwat u la ong ba ka jingthmu katei katei ka Rally ka long ban pynsaphriang ia ka khubor halor ka phang “ban tyngkai ia ka um bad pynneh pynsah ia ka” na ka bynta ka bha ka miat hadien habud kumjuh ruh ban pyntip paidbah halor ka thong jong ka JJM ban pynpoi um ha manla ki tyngkong iing hapoh jong ki shnong, ki skul bad ki anganwadi centre ha SWKHD. U la ong ruh ba ka long kawei na ki lad ban ai jingtip sha u paidbah ba kumno kin sumar ia ka mei mariang, ia ki tyllong um, ban ym pynjakhlia ia ki bad kumno ngin tyngkai ia ka um.

Haba pynkut ia katei ka prokram ha phyllaw ophis PHE u i/c EE, PHE, Mawkyrwat bah R. Nongdhar, SDO Mawkyrwat Sub Division u la ai khublei ia ka jingshimbynta shitrhem jong ki khynnah skul, ki lad pathai khubor, ki paidbah bad ki nongtrei katei ka ophis. U la ong ruh ruh ba katei ka jingiaid paidbah ka la pynshai shikatdei ia u paidbah ha kaba iadei bad ka Jal Jeevan Mission. U la bynrap ruh ba katkum ka JJM dei ban pynpoi um lut ha man la ki tyngkong iing hapoh district. U la iathuh ruh ba katba dang mih ki sngi ka um ha ki wah ka nang duna bad ka daw ka long ka jingpynjulor ia ki khlaw ki btap, ka jingpynjaklia ia ki tyllong um bad ki wah, ka jingbret jakhlia pathar, bad ka jingkhluit tyrha ka pyrthei (global warming). U la ong ba ngi dei ban pynneh pynsah ia ki tyllong um da kaba kiar ban pom ia ki dieng ki siej ioh ba ngi poi sha u pud jong ka jingkyrduh um. U la pynkut da kaba ong ba ngi dei ban long kiba niewkor ia ka um ioh ka poi ka por ba ka um ka kham rem ban ia ka ksiar.

 

As a mark of respect to the demise of Late. Shri. Rowell Lyngdoh all Government offices in SWKHD will remain closed on 15th March, 2022

Kum ka jingburom ia ka jingkhlad noh u Bah Rowell Lyngdoh, pynbna shuti ia ki ophis sorkar ha SWKHD

Mawkyrwat, Lber 14, 2022: Ka Deputy Commissioner jong ka South West Khasi Hills District, Mawkyrwat ka pynbna ba kum ka dak jong ka jingburom ia ka jingkhlad noh u Bah Rowell Lyngdoh, u ba long u nongthawain barim jong ka Meghalaya Legislative Assembly ba nyngkong na Mawkyrwat Constituency ha u snem 1972, baroh ki ophis sorkar hapoh South West Khasi Hills District kin khang ha ka sngi ba-ar katta ka 15 tarik Lber, 2022 na ka daw jong ka jingkhlad noh ka jong I ha ka 13 tarik Lber, 2022.

 

 

As a mark of respect to the demise of Late. Shri. Rowell Lyngdoh all Government offices in SWKHD will remain closed on 15^th March, 2022

Mawkyrwat, March 14, 2022: Smti. C. Kharkongor, Deputy Commissioner, South West Khasi Hills District, Mawkyrwat issued an order that as a mark of respect to Late Shri. Rowell Lyngdoh, former legislator to the first Meghalaya Legislative Assembly from Mawkyrwat Constituency in 1972, all State Government Offices in South West Khasi Hills District shall remain close on Tuesday the 15^th March, 2022 on account of his demise on 13^th March, 2022.

 

Shongkun ka jingrakhe International Women’s Day ha Photkroh, SWKHD

 

Mawkyrwat, Lber 08, 2022: Ka jingrakhe Sngi kyrpang ki kynthei (International Women’s Day), 2022 ka la long kaba shongkun bha ha Photkroh. Ia katei ka prokram la pynlong da ka ophis jong ka District Social Welfare, South West Khasi Hills District (SWKHD), Mawkyrwat ha ka jingiatreilang bad ka District Legal Services Authority (DLSA), SWKHD mynta ka sngi kaba la pynlong ha Photkroh Community Hall halor ka phang “Gender Equality today for a Sustainable tomorrow” (Ka jinglongryngkat jongki kynthei bad shynrang mynta na ka bynta ka roi ka par kaba neh ha ka lawei) bad ba la iashim bynta da kumba 120 ngut ki riewkynthei.

Ban pynshongshit bad kham pynshongkun shuh shuh ia ka sngi kyrpang ki kynthei ka MSRLS, Ranikor BBMU ka la pynlong ia ka jingiaid paidbah ki kynthei ba dei member jong ki SHG ryngkat bad ki slogan na Mawhati Community Hall sha Photkroh Community Hall kumjuh ruh ki la sam ia ki khusnam ha kaba iadei bad ka jingthoh slogan ha kaba ka Jarig SHG, Munai ka la ioh ba nyngkong, Ka Nangrin SHG, Mawhati ka la ioh ba-ar bad ka Janggani Tangani, Mawhati ki la ioh ia ka kyrdan kaba lai.

Ka SI A. Sawkmie O/c Women Mawkyrwat PS ka la kren halor ka hok ki kynthei bad ki ain ba ki lah ban ioh jingiada. Ka la ong ba ki jingeh ba ki kynthei ki ia kynduh ki long ka jingshah thombor hapoh iing pohsem (Domestic violence), ka jingkhaii ia ki kynthei kiba long ha ki ar bynta kawei ka long ban pyniaid ia ki kynthei ha ki kam awria bad ban khaii ia ki dkhot met ha kiwei pat, namar ka internet ka la jyllei ka jingpyndonkam ia ki dur ne video ba khlem akor (pornography), ka jingbuddien ia ka jingim ne ka longrynieng jongki kynthei (stalking) khamtam lyngba ki social media, bad ka jingshah thombor ha ki jaka trei na ki ba halor ne kiba iatreilang bad ki. Ka la ong ba ki longiing ki lah ban mat shibun ki jingeh namar kim nud ban pynpaw shabar ia kaei kaba jia hapoh iing jongngi bad dei namar katta ba la buhrieh ia shibun ki jingjia ba sniew bad ba ka sorkar ka thaw ia shibun ki ain ban iada bad lyngba ki pulit ka tehlakam ia ki jingsniew kiba jia ia ki kynthei lyngba ki thanad jong ki kynthei. Ka la kyntu ba ki briew ki ju dei ban buhrieh ia ki jingsniew hapoh iing pohsem ne ha ka imlang sahlang hynrei ki dei ban pyntip sha ki bor jong ka ain khnang ba ki runar kin ym iohlat shuh ban pynjot ia kiwei pat. Ka la iathuh ruh ba bunsien ki briew ba shah thombor ki long kiba duna ha ka pyrkhat pyrdain, ki briew kiba duk bad kiba shemlanot.

Haba kren ha katei ka sngi ka kong Noshmi Hahshah, Advocate District Legal Services Authority (DLSA), Mawkyrwat ka la kren halor jong ka ain ba iadei bad ki kynthei. Ka la ong ba ki don bun bha ka jingniewshiliang ne ka jingbym ryngkatdor bad ki kynthei bad dei na kata ka daw ba ki mih ki ain ba iadei bad ki kynthei. Ka la ban ba ka don ka jingiapher ha ka imlang sahlang kum ha ka jingphah leitskul, ki kam ki jam, ka jingsiew duna dor haba trei ia kajuh ka kam kumba trei ki shynrang bad kiwei de. Ka la ong ba ki kynthei kim dei ban long tang ki nongsumar iing hynrei ki dei ban tur ha ka imlang sahlang bad peit ia ka roi ka par. Ka la kyntu ba ki kynthei ki dei ban ieng hala ki jong ki kjat ban pyntip ha ki bor jong ka ain khnang ba kin lah ban ai jingiarap. Ka la ong ruh ba bunsien ki briew ki kynnoh ia ki bor jong ka ain hynrei ka daw ba nyngkong ka long ba ki briew kim pyntip sha ki bor jong ka ain ia ki kam sniew. Ka la ban ba lada ngim sdang ban tehlakam na ki kam sniew kiba rit ki briew kin sa sdang ban leh ki kam sniew ba khraw ha ka imlang sahlang. Ka la iathuh ba ki kam sniew pyrshah ia ki kynthei ki kham bun ban ia ki kam sniew ia ki shynrang. Ka la batai ruh ba ka sorkar lyngba ka DLSA ka ai ia ka jingiarap katkum ka ain khlem da donkam ban siew pisa eiei ia ki plidar. Ka la batai ruh ba kino kino ki mukotduma ba iadei bad ki kynthei ki lah ban ioh lyngba ka DLSA ban ialeh pyrshah ia ki kam sniew ha ka imlang sahlang.

Ka Kong L. Marpna, Paralegal Personnel/Lawyer, One Stop Centre (OSC), SWKHD

ka la kren halor ka jingialong ryngkat ki kynthei bad shynrang ha ka imlang sahlang katkum ka kyndon ain ba 14 jong ka Constitution ka ri India bad shaphang ka One Stop Centre (OSC). Ka la iathuh ba ki skhim ba iadei bad ki kynthei kum ka Pradhan Mantri Rozgar Yojana, Ka Women Helpline Scheme da kaba phone ha u number 181, Rajiv Gandhi Creche Scheme na ka bynta ki longkmie ba trei ba ktah bad ka One Stop Centre Scheme da ka jimgthmu ban ai jingiarap ia ki kynthei ba mat ki jingeh ha ki iing ki sem ne ka imlang sahlang. Ka la batai ruh ba lyngba ka OSC ki lah ban ai jingiarap ban thoh ia ka ejahar ban ujor mutkotduma. Ka la iathuh ba ka jingthmu ka OSC ka long ban tei ia ka iing ka sem ym ban pynpra da kaba ai counselling. Ka la batai ruh ba ka OSC ka iatreilang bad ki tnad sorkar bapher bapher ban ai jingshngain ha ka imlang sahlang bad ki kynthei ki lah ban pyntip ia ka jingeh jongki. Ka la kren ruh shaphang ka jingpynkupbor ia ki kynthei (women empowerment) ha ka imlang sahlang bad kaa la ong ba ka ri bad ka jaitbynriew kan kiew tang lada ki kynthei bad ki shynrang ki la long mar ia katjuh. 

La pyniaid ia katei ka prokram da ka kong H. Sahkhar, CDPO bad I/c District Social Welfare Officer, SWKHD bad la kren ai khublei da ka kong B. Wanniang, Supervisor O/o District Social Welfare.

U ei une u Elder Helpline bad kiei ki jingmyntoi ba ki riewtymmen ki lah ban ioh?

 

U Elder helpline u dei u number phone 14567 u ba treikam naduh 8 baje mynstep haduh 8 baje da miet baroh shi taiew na bynta ban iarap ia ki tymmen ki khro ba kynthup ia ki kynthei ba naduh 58 snem shaneng bad ia ki shynrang 60 snem shaneng.

La pyntreikam ia u Elder Helpline number 14567 naduh ka 1 tarik u Risaw, 2021, kylleng ka ri India bad ha ka jylla Meghalaya jong ngi la sdang ban pyn treikam ha ka 13 tarik, Nohprah 2021.

Lyngba u Elder Helpline ki riewtymmen ki lah ban ioh jingtip shaphang ki Hospital ban sumar, ki lad jingiarap ban ai jaka sah lane ki iing sah tynmmen bad ban ai jing sumar kum ia ki ha CHC bad PHC Sorkar. U Elder Helpline u ialam lynti ba kumno bad nangno ba ki riew tynmmen ki lah ban apply ia ka bai bam Tynmmen ba ai ka sorkar bad ka btin lynti ia ki tynmmen sha ki nongsait ain shaphang ki ain ki kanun kum ka Maintenance Act 2007. U Elder Helpline u ai ruh ka Jingpyntngen bad ka jingkyrmen da ka ba ki sngap iaki jingeh bad ka jing thut bad ban ai pat ia ki ia ki lad jing pyntngen bad jing kyrmen. Kumjuh ruh lyngba u Elder Helpline ki riewtymmen lah ban ioh ki jingiarap ha ki rukom bapher bapher kum ka sumar ia ki bym don iing donsem ne ki bym don ki bahaiing ha sem.